ភ្នំពេញ៖ សមាជិកព្រឹទ្ធសភាបារាំង និងជាប្រធានក្រុមមិត្តភាពអន្តរសភាបារាំង-កម្ពុជាលោក M. Vincent ÉBLÉ ថាលោកច្រណែនកម្ពុជាដែលមានអំណោយផលធម្មជាតិជាពិសេសគឺមានទន្លេមេគង្គដែលជាប្រភពទឹកដ៏សំខាន់សម្រាប់ផ្គត់ផ្គង់ជូនពលរដ្ឋ។ លោកថ្លែងបែបនេះក្នុងពេលដែលចូលជួបសំដែងការគួរសមជាមួយប្រធានព្រឹទ្ធសភាកម្ពុជា ព្រឹកថ្ងៃសុក្រ ទី១៧ ខែឧសភា ឆ្នាំ២០២៤នេះ នៅវិមានព្រឹទ្ធសភា ភ្នំពេញ។

ក្នុងជំនួបនេះលោក M. Vincent ÉBLÉ បានកោតសរសេរពីដំណើរការអភិវឌ្ឍន៍កម្ពុជា ហើយបារាំងពិតជាមានមោទនភាពដែលបានរួមចំណែកដល់ការអភិវឌ្ឍនេះជាពិសេសគឺការធ្វើស្ថានីយ៍លើទឹកស្អាតបាក់ខែង។ លោកថាលោកច្រណែនកម្ពុជាដេលមានទន្លេមេគង្គសំបូរទឹកប្រើប្រាស់ ខណៈដែលនៅបារាំងតំបន់ដែលលោករស់នៅគឺត្រូវបូមទឹកពីក្នុងដីមកប្រើប្រាស់។

ប្រធានព្រឹទ្ធសភាសម្ដេចតេជោ ហ៊ុន សែន បានថ្លែងអំណរគុណចំពោះការវិនិយោគបារាំងលើស្ថានីយ៍ទឹកស្អាតបាក់ខែង ខណៈសម្ដេចថា កាលពីឆ្នាំទៅកម្ពុជាមានការលំបាកដោយសារការខ្វះខាតទឹកប្រើប្រាស់ជាពិសេសនៅតំបន់តាខ្មៅ នៃខេត្តកណ្ដាល ហើយក្រុមហ៊ុន វ៉ាងស៊ី និងអ្នកបច្ចេកទេសបារាំង បានរៀបចំបណ្ដាញនៅបាតទន្លេ ធ្វើការបញ្ជូនទឹកនេះ មិនត្រឹមតែប្រើប្រាស់នៅក្នុងរាជធានីភ្នំពេញទេ គឺបានបញ្ជូនទៅកាន់ជាយក្រុងថែមទៀត ឱ្យមានទឹកប្រើប្រាស់។

 ទន្លេមេគង្គ គឺជាទន្លេវែងជាងគេលំដាប់លេខ១២នៅក្នុងពិភពលោក ដែលជាទន្លេដ៏សំខាន់មួយរបស់ពិភពលោក។ ទន្លេនេះហូរកាត់ប្រទេសកម្ពុជាមានប្រវែង ៥០០គីឡូម៉ែត្រ ដែលចាប់ពីល្បាក់ខោននៃប្រទេសឡាវរហូតដល់ព្រំប្រទល់ប្រទេសវៀតណាម៕